FAST POST 41: Magpasalamat

Hindi tulad ng inakala nating sobrang lakas nitong nagdaang araw, marami pa rin ang naging mahimbing ang tulog dahil hindi naging malakas ang pagpaparamdam ni Bagyong Rolly dito sa Metro Manila. Malamig ang naging buong gabi pero hindi nakakabahala at hindi naging mapaminsala.

Si #RollyPH ang sinasabing pinakamalakas na bagyo ng 2020 sa buong mundo. Walang duda ito, lalo’t napakaraming buhay ang binulabog niya, lalo na sa parte ng Bicol. Kasabay ito ng pandemya na nauna nang gumulo sa buhay ng buong Pilipinas at ng buong daigdig, at kumitil din ng napakaraming buhay. Pero sa kabila ng kinaharap nating kaliwa’t kanang trahedya, na ayon sa kilala kong pari ay “year-long Halloween”, mahirap man at masaklap ay hindi dahilan para kalimutang magpasalamat —

Magpasalamat sa mga kapamilya, mga kaibigan, mga kapitbahay, mga nakakaluwag-luwag sa buhay, sa mga lingkod bayang hindi alintana ang Sabado at Linggo para tumulong sa iba’t ibang pamamaraan, at higit sa lahat, sa Diyos na lumikha ng lahat.

Pero sana, kasabay ng pasasalamat ay ipanalangin natin ang mga dumaranas ng hirap gawa ng kalamidad. Mapalad tayong may nasisilungan, may nakakain, may kakayahan pang tumawid nang maraming araw na maginhawa. Hindi man sa materyal na bagay, huwag natin silang kakalimutan na ipagpasalamat na buhay pa at ipagdasal na marami ang tumulong sa kanila at kayanin ang pagsubok na ito.

Ang dasal ay isang bagay na hindi makakain o hindi masusuot, pero higit ito sa lahat dahil hindi matutumbasan ang dala nitong biyaya sa anyong hindi natin inaasahan… sapagkat ito ay handog ng Maykapal.

FAST POST #26: No Classes Due To Strong Prayers Of Students

PAALALA: Kung estudyante ka at babasahin mo ang artikulong ito, ihanda mo ang sarili mo na makonsensya at mag-isip-isip kung tama bang matuwa ka sa mga pangyayaring pabor sa’yo pero hindi pabor sa maraming tao.

habagat01

Larawan noong kasagsagan ng Habagat noong Agosto 2012.

habagat02

Larawan noong kasagsagan ng Habagat noong Agosto 2012.

habagat03

Larawan noong kasagsagan ng Habagat noong Agosto 2012.

Habang tinitipa ang artikulong ito ay pangalawang araw nang sinuspinde ng pamahalaan ang klase sa mga unibersidad dahil sa bugso ng Habagat na pinaigting ng bagyong Maring. Nagbunyi ang maraming estudyante dahil daw lalong napahaba ang LONG WEEKEND (special non-working day ang August 21 dahil sa death anniversary ng dating senador Ninoy Aquino) at maraming time para mag-DOTA, mag-Facebook at mag-EMO.

Pero ang pinaka-kumuha talaga ng aking atensyon (na noon ko pa napapansin pero ngayon ko lang kinainisan) ay yung mga tweet at post na kalat na kalat sa social media: “NO CLASSES DUE TO STRONG PRAYERS OF STUDENTS”.

Nakakatawa siya noong una, pero sa mga totoong gumawa ng birong ito, nanalangin ka ngang walang pasok, PERO…

1.) Naisip mo bang may naghihirap sa gitna ng rumaragasang baha habang pinagsisigawan mo sa Facebook ang kalandian o ka-emo-han mo?
2.) Naisip mo bang may nagugutom habang nakahilata ka sa sofa at kumakain ng paborito mong chichiryang hindi naman masustansya?
3.) Naisip mo bang may mga batang nagkakasakit habang lulong ka sa kung anumang online game na nilalaro mo?
4.) Naisip mo bang maraming palayang nasira habang nasa kama ka’t nagpapataas ng level sa Candy Crush?
5.) Naisip mo ba ang mga guro mong mawawalan ng sweldo habang nagpapakasaya ka sa hashtag na #walangpasok?
6.) Naisip mo ba ang mga estudyanteng nawalan ng eskwela’t gustong mag-aral habang ayaw mong pumasok dahil sa tinatamad ka lang?
7.) Naisip mo ba ang mga magulang mong nagpapaaral sa’yo habang may oras ka naman pero hindi mo pa ginagawa ang mga assignment mo?
8.) Naisip mo bang tumulong sa simpleng paraan na kaya mo kaysa humingi ng pampa-load?
9.) Naisip mo bang ihanda ang sarili mo sa posibleng mangyari sa mga kaganapang tulad nito kaysa isipin ang gagalaan mo sa susunod na araw?
10.) NAISIP MO BANG IPAGDASAL ANG KALIGTASAN NG LAHAT KAYSA IPAGDASAL MONG WALA KANG PASOK?

Aminado akong noong estudyante ako ay tuwang tuwa ako kapag walang pasok kapag may bagyo, pero hindi ko ginawang biro na ipagdasal kong mawalan ng pasok kaysa ialay ang panalangin sa mga kababayan nating nakatapak sa hukay ang isang paa nila patungo sa kamatayan dahil sa trahedyang kinakaharap nila.

JUAN KABATAAN: Panalangin Para Sa Malinis Na Halalan

WRITER’S NOTE: Napakasaya kong likhain ang dasal na ito dahil para sa akin, panalangin ang isa sa mga pinakamakapangyarihang sandata nating mga Pilipino upang makamit natin ang maayos at malinis na halalan. Nawa’y maging hudyat si Juan Kabataan upang mapanatili natin ang kapayapaan sa eleksyon, hindi lang sa paparating na Mayo 13, kundi sa mga susunod pang halalan sa lungsod ng Maynila na aking ikinararangal at sa ating bansang labis na minamahal.

Isang produksyon ng KATIPUNAN NG KABATAANG MAAASAHAN


JUAN KABATAAN
PANALANGIN PARA SA MALINIS NA HALALAN

Panginoon, kami’y nagpapasalamat sa bigay Mong buhay —
buhay na Iyong itinakda upang pangalagaan ang mundong Iyong obra;
buhay na Iyong pinahiram upang ibahagi sa aming kapwa;
at buhay na Iyong binigyang lakas upang paunlarin ang lipunang Iyong likha.

Ngayong eleksyon ay hinihingi namin ang Iyong gabay —
gabay para sa mga kakandidatong lider ng lungsod naming mahal;
gabay para sa mga magbabantay ng mga balotang kinalalagakan ng mga inihalal;
at gabay para sa mga boboto, gamit ang talino, dangal at mataimtim na dasal.

Amang kataas-taasan, hangad namin sa halalang ito ang pag-unlad —
pag-unlad na magpapaginhawa sa buhay ng bawat nangangailangan;
pag-unlad na magsasaayos sa sistema ng magsisilbi sa pamahalaan;
at pag-unlad na magdadala sa lahat ng magandang kinabukasan.

Nawa kaming mga kabataan ay magsilbing Iyong imahe —
imahe ng mamamayang nagtitiwala sa mga manunungkulang uupo;
imahe ng konsensyang nagpapaalalang maging tapat ang mga partidong tatakbo;
at imahe ng pwersang handang tumulong at makiisa sa mga bubuo ng gobyerno.

Buong pananampalataya kaming dumadalangin;
Nawa’y Iyong pakinggan at dinggin;
Ang aming papuri, parangal at pinagsama-samang hangarin;
Sa Iyo’y inaakyat namin.

Para sa aming hinahangad na masaganang kinabukasan, para sa Pilipinas na aming mahal na Inang Bayan, at para kay Hesukristong aming nag-iisa’t dinadakila naming Panginoon.

Amen.